Berbak legezko aiztoak
Berbak legezko aiztoak
1990, poesia
54 orrialde
84-86766-29-X
azala: Joanes Urkixo
Joanes Urkixo
1955, Bilbo
 
 

 

9

 

Gauean baditun handitasuna eta lilura

basoak eta izakiak elkarrekin joaz

eta hi ere bahago.

Gauean baditun bidaiariaren urratsak eta

ilunpeko ernaria eta neonezko argiak

(eta itzalaren semeak).

 

Gauean trenak eta itsasuntziak igarotzen ditun

eta argiztuta dagoen herriaren espejismoa

ilunabarreko azken adorea eta

egunsentiaren promesa.

Eta hi ere bahago.

 

Kanta soinu bat gauean, ahots epel bat

ate baten astindua, hirurak erlojuan

eta ez soil-soilik izakiak eta gauzak eta hotsak

baita ni ere baniagon

ez zekinat zeren atzetik baina.

Eta hi ere bahago

hi itxaroten dudana.

 

Begiak ixtean

irudi arrotzak zetozkidan gogora.

Begiak ixtean

dirdira fluorezentez betetzen zaidan

irudimena

eta hi ere bahago, dudarik gabe, urrats zail hauetan.

 

Gauean nire ametsak herri estrainio eta beldurgarriak

ikertzen dizkin

eta urtziaren eta izarren dastakera

eta bi mila eguneko oilarraren deia

 

Gauean baditun izarrak eta itsasoaren mugimendua

errekak hiriak basoak belarra

ehundaka gizonen b-i-r-i-k-i-a-k.

Gauean baditun munduaren sekretuak

baina ez zegon jainkorik.

Hi berriz hi bahago

hi berba errazak erdeintzen ditunan hori

nire ametsaren oinarria.

Gauean bahago eta egunean

egon egongo haiz.