Bizia denaz gainetik

Egun batzutan neure buruko

muga klaru eta purua

hautsi egin da.

Inurri urduriak,

ustekabeko bisitari bitxiak,

nire garunean sartzean,

adimenaren iturburu sendoa

akitu egin da.

Baina, hondarrean,

arrazoi gorenei buruzko itaunketa

errukigabe eta gogorra

sufrituz gero,

dena argitu da benetan.

Bizia denaz gainetik,

baina bihotza harrapatuta

erremediorik gabe.

Esperantza ororen aurka

abentura uher honen bukaera

itxaron eta arindu dut

zorigaitz orokorraz sinestu gabe.

Bidaialagun erabat xelebre

eta gizarajoak ziren.

Beldurrez jositako jakinminez

itauntzen zidaten.

Beren zorigaitzaz pentsatzen nuen artean

beraiek neurea aztertzen zuten

errukirik gabe,

joku arauen agindupean.

Partida amaitzean,

beren eskuak estutuz,

edo emakumeak baziren,

aurpegiak laztanduz,

haur sentitzen nintzen

ama askoren semea bide batez.