Poesia kaiera
Poesia kaiera
June Jordan
itzulpena: Ane Garcia Lopez
2020, poesia
64 orrialde
978-84-17051-43-3
June Jordan
1936-2002
 
 

 

Poeta gazte bati poema

 

Erwin Cho-Woods-i eskainia
1997ko maiatzak 27

 

Pertsona gehienek bizitza osoa

ematen dute

beren tokiaren bila,

zuk esan bezala,

baina nik

hitz egiten didan edonoren

begien barrura egiten dut so

 

Aurpegi sinesgarri

eta abegikor baten bila nabil,

maskara askatu bat

ahotsa

belarriak eta kontzientzia dituena

ikus dezakedan

sudur batetik

arnasa hartzen

 

Egunez egun

bide ezagun.

Gustatzen zait bidaiatzean igartzea

masail baten koloreak

bekain baten kurba

bi ezpainen

aitorpen publikoak

 

Ongi da!

Ez dut esan gizon

edo emakumezko,

ez dut esan serbiar

edo tutsi,

esan dut

ni neu

beldurrari edo izuari kontra egitera naramana

dela hitz egiten didan

edonor

 

Aurpegi bat

aldarrikatu edo itauntzeko

nire hurrengo pausoa urrun

edo gertuago emango ote dudan

 

Hamabost anemona

barkamena adina zabal,

leun,

horren irekita datzana,

beti ariko baita erle eske

 

Goiza,

txori-kanta eta ihintza

atxaparretan nahasita

ateratzeko gonbita egiten,

eta nire maitalearen ilea eguzki argitan

nire hatzekin korapilatuta

 

Aurpegi bat

kitzikatu edo debekatzeko

nire lilurazko hurbiltasuna

edo bestela

agoniazko gaitzespena

 

Arimaren itolarriak

darama ama

bere haurrei

uko egitera

haiek bakarrik utziz,

hezur eta hautsa

elikagai

 

Aurpegi bat

gorpuaz gaindi

sehaska inbaditzen dut

nire maitasuna kulunkatzeko

bizirik

 

Aurpegi bat

inor eza eta ezereza konektatzen dituen

Interneten moda txepelaz gaindi

 

Aurpegi bat

zeruko

klera-lerro

narkoleptiko/antiseptikoen aurka:

gezurra diote,

eta kreditu txartelak

eta egia almidoituak aurkezten dituzte

froga bikain gisa adierazteko

zuk eta nik

ez dugula defendatu behar

komun-zuloko

eta zapaltzaileen balen aurkako erabakietatik,

zeinak limusinetan hartzen baitira:

pantaila handia haien artean banatzen dute

urrezko puntutan

bailara hotzaren gainetik

hegaka dabilen itzal barkaezina dira

txiki

txiki

txiki

arnasa hau eta arnasa hura

eta orduan

hau eta hori

heriotza hura

 

Aurpegi baten bila nabil,

maskara askatu bat

ahotsa

belarriak

eta kontzientzia dituena

ikus dezakedan

sudur batetik

arnasa hartzen

 

Aurpegi baten bila nabil

genozidioari oztopoak jarriko dizkiona

hilez harago bilatzen dut

eta

bizidunen ikuspegi inperfektuak gidatzen nau

ez eta bai

etorri eta banoa

niri hitz egiten didan

edonoren begietara

itzultzen naiz