Poesia kaiera
Poesia kaiera
Cesare Pavese
itzulpena: Ion Olano Carlos
2019, poesia
64 orrialde
978-84-17051-27-3
Cesare Pavese
1908-1950
 
 

 

The cats will know

 

Ostera ere jausiko dun euria

hire harri gozoen gainean,

euri arina,

hats baten edo urrats baten gisan.

Ostera ere haizekirria eta egunsentia

loratuko ditun arin

hire urratsaren azpian bezala,

etxeratzen haizenean.

Loreen eta leihoen artean

katuek baietz jakin.

Izango ditun bestelako egunak,

izango ditun bestelako ahotsak.

Bakarrik egingo dun irri.

Katuek baietz jakin.

Entzungo ditun antzinako hitzak,

hitz aspertuak eta hutsalak,

bezperako festetako

soineko baztertuen gisakoak.

Hik ere egingo ditun keinuak.

Erantzungo ditun hitzak…

udaberriaren bisaia,

hik ere egingo ditun keinuak.

Katuek baietz jakin,

udaberriaren bisaia;

eta euri arina,

hiazinto koloreko egunsentia,

itxaroten ez hautenen

bihotza urratzen dutenak,

bakarrik egiten dunan

irribarre tristea ditun.

Izango ditun bestelako egunak,

bestelako ahotsak eta iratzartzeak.

Sufrituko dinagu egunsentian

udaberriaren bisaia.