Breizh II

Kenavo Breizh, oi Breizh maitea!

zure lanbroaren hegalean jarririk

ibilia naiz zure oihartzunetan barna,

bide bazterretan

harrizko herri heze ñabar bat agertu zait,

Kemper-eko karrika zaharretan

Oanez deitu begitarte zabaleko neskatxa tinkoak

gizaseme sendoak

buruan kofiadun emakume xahar maitagarriak,

zure hatsa

lanbroaren mezua, gizakien auhen eta poza

musikaren bitarteaz da

oroimenaren ortzimugan desleitzen,

zure bizitza

kan-ha-diskan bat

gavotta dantzan da lotzen ari

Karnag-eko harri zaharrak dantzari

bukaerarik gabeko fest-noz zoragarrian,

Gwendal

Roazhon-eko xirularru joile jatorra

erdi aroko irudi batetik sortua iduri

musikalari aspergaitza

kondairaren ihauteri eta dantzaren gidari

zapela zahar

zaharragoak sena eta nahikari,

Breizh

herri haurridea

egungo maizter dohakabea

zapela eta musika hartu eta

kondairan barna zoazena,

iduri luke

musika telurikoan bakarrik atzematen duzula

barda gauean Brest-eko karriketan ebatsi zentzua,

oi Breizh,

herri zahar maitagarria

eskua nahi nizuke luzatu

sentipenak azaldu

baina...

garai batean, antzinean, hobeki ezagutzen genuen elkar

—oroitzen?—

horrengatik

hiru punttuko gavottan lotuko garelakoan elkarri

oroitzapenez josi ametsean

ari nauzu egungo argisentian

zuri kantari.

w1975-76

                Kenavo: agur.

                Oanez: emakume izena.

                Roazhon: Rennes.

                Gwendal: gizon izena.

                Kan-ha diskan: Kantu kontrakantua.

                Fest-noz: gau-festa.