Poesia kaiera
Poesia kaiera
2001, poesia
64 orrialde
84-95511-22-3
Jose Angel Irigaray
1942, Iruņea
 
 

Aiezkoako mendietan

Auñamendiren magalean

Iratiko oihanaren itzalean

bihotzaren erdian

euri, elur eta laino

laino guztien artean

zegoen eta dago

                        bakardadean

                        isilean, lo

Orbaizetako ola

Orbaizetako fabrikaren hondarra

oroitzapena,

 

aunitz kostata

mendi pare baten ordainez

mendez mendeko sua

bizirik eusteko

biziagorik uzteko

                        su zahar

                        berpizte berri

ola zaharraren tokian

sortu zen berria,

 

han

oihan eta laino

Xangoaren altzoan

                          ur eta zur

                          su eta harri

lurrean sakonki errotua

ingurumariari ohi ez bezala itsatsia

han

lerden eta eder

lantoki berezia,

 

su eta ur

atzo eta gaur

bizitzaren bi habe

Orbaizetako olaren zutabe,

ur garbia

tegiak, sutegiak eta lau labe,

gure industrigintzaren egunsentian

itxaropenezko amets

eta atsekabe

 

                                        tegi baliosa

                                        altxor preziatua

                                        karlistek eta liberalek

                                        borrokatutakoa

                                        osinean amildu eta gero finean

                                        edozein haizeren menpekoa,

                                        zure azken hatsaren lekuko

                                        Telleria zuzendaria

                                        zure magalean ehortzia

                                        Xangoaren bakean

                                        labeen ondoan

                                        fago batzuen azpian

                                        sabeleko suaren getari

                                        hilik ere zeletan,

Orbaizetako ola

atzoko nahiaren hondar bizia

labeetan su itzalia

gure bihotzetan sukarra,

bitartean

ura bere bidetik

Xangoa beti jauzika

ezker-eskuin

                  olaren bihotz harriztatua

                  gure nahiaren oinarria

fereka eta kanta

bitartean

gure oroitzapenaren ametsak

uraren xingolaz dira jaunzten

eta Iratiko oihanean barna

desleitzen

              bizitzen

                          hiltzen,

 

Orbaizetako ola

gure amets harriztatua

itxaropen urtua

hor zaude

zu zara

mendien erdian

euri, elur eta laino

gure haragi urratuaren

hondar hil eta bizia,

Orbaizetako ola zahar

                  eta berria

gure izatearen oroitarria.

 

w1975-76

Musika: Benito Lertxundi