Poesia kaiera
Poesia kaiera
2001, poesia
64 orrialde
84-95511-21-5
Bitoriano Gandiaga
1928, Mendata
2001, Arantzazu
 
 

Gizonak lanera irten du,

kioskoan periodikua erosi du,

Metroko eskailera automatikoz behera jaitsi da

                                                              ta

Metroan periodikua irakurriz doa:

Astelehenekoa.

Metroko eskailera automatikoz gora irten du gizonak,

presaka sartu da lantegira,

lan egin du lantegian eta

aldatu gabe buzoa,

bazkaltzera irten du. Bidean

ez du agurtu inor. Sartu da

etxean eta etxetik

lanerako irten du

presaka presaka.

Metroko eskailera automatikoz behera jaitsi da

                                                              ta

Metroan lo-kuluxka doa. Metroko

eskailera automatikoz gora irten du gizonak,

presaka presaka lantegira sartu da;

lan egin du lantegian eta

bukatu du eguneko lan-aldia. Txikito bat

edan du bidean eta etxean sartu da. Gizonak

lanera irten du presaka presaka;

kioskoan peridikua erosi du; Metroko

eskailera automatikoz behera jaitsi da

                                                  ta

                                      Metroan

periodikua irakurriz doa: Asteartekoa.

Metroko eskailera automatikoz gora irten du gizonak,

presaka presaka lantegira sartu da

                                              ta

lan egin du. Gizonak

atzoko lan-modu bera egin du,

atzoko bizi-modu bera egin du presaka presaka.

Bihar

kioskoan periodikua erosiko du: Asteazkenekoa.

Metroko eskailera automatikoz behera jaitsiko da

                                                                  ta

Metroan periodikua irakurriko du herenegun bezala.

Metroko eskailera automatikoz gora irtengo du gizonak,

presaka presaka lantegira sartuko da

                                                ta

aurreko astean bezala, lan-modu bera egingo du,

bizimodu bera, aurreko urtean bezala.

Etzi Osteguneko periodikua erosiko du.

 

w1977