Poesia kaiera
Poesia kaiera
2000, poesia
64 orrialde
84-95511-18-5
Patziku Perurena
1959, Goizueta
 
 

Arratsaren eltzeitsuan

 

Urrezko sokak bilduxe dittu

Udatzen arratsaldeak,

Ilun adatsen mototsak lotu

  Haizearen matxardeak.

Gau sorginduak hegan dabilzki

    Zoramenaren sardeak.

 

Gogoa, bere hutsean, zenbat eta gorago

              Gorputza orduan eta lorrago!

 

Milla izarren zilar soinua

Arratsaren eltzeitsuan.

Gogo hustuan, poz murmurio,

  Urak marmar berritsuan.

Jainko usaia dakar haizeak

    Oroipenen intzentsuan.

 

Gogoa, bere hutsean, zenbat eta gorago

              Gorputza orduan eta lorrago!

 

Goranahi honek non du sorrera

Batek ahal baleza jakin!

Atseginaren zurrunbiloan,

  Bihotzak nahi du irakin.

Zentzu guzien dardar izuan,

    Huts urdinera hegamin.

Gogoa, bere hutsean, zenbat eta gorago

              Gorputza orduan eta lorrago!

 

Irudipenen zorabioan,

Milla sugeren nahaspilla.

Biziontzian hilargia odol

  Gozamen zaharren aspilla.

Urdin hutsean galtzen da beti

    Giza bihotza arnas billa.

 

w 1990