Poesia kaiera
Poesia kaiera
2000, poesia
64 orrialde
84-95511-12-6
Juan Mari Lekuona
1927, Oiartzun
2005, Donostia
 
 

Larrazken

 

Zuhaitzak biluzik orbelen ehorzketan.

Paseko hegaztiek —eraskotako gezi-burrundez—

imandu zuten transumantziaren orratza,

erriberantzetako irrika zainetan burbuilatuz.

 

Larreko seme-alabak —abelbideetan

barrena— ibai epelaren kalostroetara.

 

Udazkenak hona ezarri bere eko-

-susmoa. Bustia du arau: lur usaina,

lanbroen zurbila, haizearen eskala

kromatikoa. Itsasoaren tailerretako ederkera.

 

Elurra ehule bortuetan: mihisak

zabaltzen ari ifarreko oreina

zuriari, gorostizko leran ekar

dezan, negu-lorearen opaloa.

 

Erosta-aire bat edonon. Paisaiako

ikatzetan. Eguzkiaren errepidea ardatz

duten tumuluetan. Bixkarrez-bixkar atondu-

tako lur harrotuen katafalko nabarskan.

 

Eta harkaitzetan —iraupenak sorturiko gogoz—

hil-kamerako atseden megalitikoa. Loa.

 

w1985-90