lurra ikaratu eta eraitsiko baita dorrea

haizea oldarrean jaiki

eta barreatuko baita armada

zoperna fulian abaildu

eta fundituko baita erredola

eta dorre, armada eta erredolarik gabe

baratuko da gizona, eremu zaharrean jaurtikia

billos eta amikatua, pausurik ezin edirenez

eta luzaz erratu ondoan

noizpait zerua idekiko da, harrabotsez, zauri batean

eta berriz adituko da trumoia, berriz ahotsa,

berriz ere jatena jainkozkoa ahora

harrizko legea eta egunen errota

eta orduz geroz oin berriek ebakiko dute bidea

mintzo berriez izendatuko da harzara

begiak dakusana, gogoari otu zaiona

oro leheneratuko da

miztoa eta eztia, ezpata eta luma

urzapala ta gabiraia, eguzkia ta itzala

palazioa, etxola ta ziega

etorri behar baita eguna

dena berdin izatekoa.