—148—

JON MIRANDEri

Parisera

Guatemala, 1955-XII-23

        Adiskide laztan,

        Gabon agurra zor dizut beintzat eta berandu baino lehen, ar itzatzu ene nahikari onenak Eguarri eta urte berrirako. Goxoki eginen ahal dituzu aipatu jaiok zure guraso maiteen ondoan. Zure azken gutuna garaiz ene eskuetaratu zen. Arrituko zera noski, ene hau irakurtzean oraindik Guatemalan arkitzen naizelako. Gogoz bestera adiskide. Ene kutizia ilobaren ondotxoan Caracasen jai ok egitea zenun, bainan usteak ustel atera zaizkit eta emen nadukazu. Europeratzekoan gure apaizak zenbait ertz antolatzeko utzi zituen, eta ertzok atontzeko emen gelditu nintzan; ez ditut noski, otsaila bainon lehenago konponduko, beraz orduraino emen egon bearko dut.

        Dagoneko ikusia dukezu Zaitegi or gaindi, bete izan du beintzat orra eltzeko Azilaren 26an atera baitzen emendik. Neri ez dit oraindik ezertxo ere idatzi, ez naiz ordea batere miresten. Aspaldi ikus gabeko orko ikusgarriek astia jan diote nunbait.

        Egunotan igorri dizut aldizkariaren azken banakoa. Mardula eguno bada! Ari guzietako lanak dakarzki, onak eta txarrak ere bai. Antzerki sailean Lurrikara deritzen komeriak 24 orrialde andi-mandi jan dizkigu, agertu bearra izan dugu ordea, egileak onik izango bazun. Pixkat laburrago eni ere atseginago izango zitzaidan delako antzerki ori. Esanen didazu zer derizkiozun irakurtzerakoan. Bertzeak bertze, «Gaizkigile baten azken orduak» zenbaki ortan eman dut. Dudarik gabe atsegin izango zaie gure zenbeit irakurleri. Eta orra Euzko-Gogoa emen bukatu! Agertuko ote da or nunbait, zuen artean edo? Ene dudak ditut. Benetan itsa litzate geio agertuko ezpalitz, euskal idazleok ezpaigeneukan beste palestrarik.

        Oso goibel arkitzen zera Jon, zure gutunetik ageri denez. Ez da arritzeko. Benetan dinozu; merezi ote du gero euskaldun eta euskotar diruzale zurrunei itzik ere egitea? Aiengatik lerrenak egitea? Bainan guk uzten baldin baditugu, nork xuspertuko ditu? Biotz urraturik badare, jarrai dezagun Jon euskal-lanean, etorriko zaizkigu guri ere egun obeagoak. Egia esan, azken aldi auetan gure elertiaren inguruan loraberritze bat ari da Mitxelena Prailearen lan izugarri eder bat irakurri dut egun auetan Miguel Unamunori buruz; liburu batean argitaratzeko ametsetan dabil. Maxia bide ugari emanen ditut batez ere gure aberkide jainkozaleen artean. Ikuspegi berri baten barnean artu digu Unamuno inork gaurdaino ez bezela, ezta erderaz ere.

        Ikusia dukezu gure aldizkarian zer nolako takela sortu dun nere elizaren aurkako «Euskera urkatzen» idazlanak. Oraindik ere itxuturik daude gutarrak eta ez dute ikusi nahi Eliza dela euskeraren etsairik gorriena Estatuekin batera. Ala ere ez dut nere bide ontan etsiko, ez orixe naiz ta euskaldun guziak ene aurka oldartu.

        Ene atseginak zure guraso maiteei; zuretzat besarka ertsi bat.

        Zure berrien aiduru beti adiskide.

        Aldendu egin zait Peillendarren zuzenbidea, eta fitxerua apaizak eraman zun. Atxikita bialtzen dizudan gutun au aien eskuetara el-araziko zenidake? Milesker.