—93—

Ibiñagabeitia'tar Andima'ri

1955-XII-31

        Adiskide mina,

        Eskerrik asko zure eskuthitza gatik eta Urthe Berrirako ophariak gatik. Nik ere, nihauren eta burhasoen izenean, Urthe Berri zoriontsu bat ophatzen derautzut; agian osasuna eta onhasunak ugari ukhanen ditutzu haren kursean.

        Zaitegiren ikhustaldi bat ukhan nuan eta hark zure berriak eman zerauzkidan. Bizpahirur egun baizik ez da egon Parisen eta uste dut orain Donostin dagoala. Haren Bidalien Eginak emaitza utzi derauzkit eta irakurtzen hasi naiz. Liburu ederra da eta jakinkizun anhitz erideiten 'tut hartan khristiartzaren aitzin-edestiari dagoztenak. Nik ordean Jentilen ikhusgunetik begiratzen derauet...

        Baskokeria andana bat ukhan ditugu Parisen: Eskuararen Eguna, Eskualdunak antholaturiko Eguberri-Jaia, bertze jai bat Urdezkaritzan, e.a. Ez ditut nik bereren ene presentziaz ohoratu.

        Euskal-lanari ekhitez areago diostazu. Hortarako behar nuke orain dudan baino asti gehiago: Ministeriko bizitzea ez da lehen bezalakoa, lanez leherreginik naiz eta arratsez etxeratzean oheratzez bertze asmorik ez dut. Gainera ama eri dut, eta aita ere akhitzen hasia; laster nire bizkar izanen da sendi guztiaren biziaraztea. Oraindanik bertze lanbide zerbait bilhatzen hasia naiz, baina ez dakit aurkhituko dudanez, deuz ez bait dakit egiten. Egia erran raté bat naiz osoki, Frantsesek dioten bezala eta horren jakiteak ez deraut gogo handirik emaiten nire lehenagoko asmo edo amets gurenekin jarraitzekotz. Ez naiz burges diharudun bat dilettantegoan aritzeko; ez naiz politikari demokrata bat Euskadiren hauzia nire gain hartzeko; ez naiz khristiarra egiazko Euskaldun izaiteko; gainera ez dakit pilotan, ez dantzan ere, ez musean ere. Hoik ere benetazko zioak ditut ene euskal-abotsa ixilarazteko. Damu da, zeren eder izanen zen ene ametsak egia bihurtu izan ba lira. Hainbat gaixto.

        Well, ez gaiteala hitsegi izan garrantzi guti bait dadukate, azkenean, gizakien eta gizaldeen goiti-beheitiak. Nire ilhuntarzuna argitzeko, limerick idazten hasi naiz. Angles olerki labur batzu dira hoik, ahalaz lizun eta rima aberatseko izan behar direnak; hona etsemplu klassiko bat:

        There are three ladies of Huxham

        And whenever we meets' em we fucks 'em

                When that game grows stale.

                We sits on a rail

        Pulls out our pricks, and they sucks 'em .

(Hizkuntza-hutsak = we meets e.a. beharrezko dira)

Euskaraz egin ditut zenbait:

        Ba zen gizon bat deitzen Anthony

        Irriz erran bait zerautan: «To, ni

                Botzik niagok

                Ene lagun Iagok

        Daragiolarik ene pito galant honi!»

        Ba zegoan jaun bat Elorrion

        Lan' gin gabe bizi (ba zuan zorion!)

                Esne zuan pis ' egiten,

                Ogi-zerra khak! egiten

        Eta segai ordez ezti ba zerion.

        Ikhusirik arrebaren matxana

        Kristobalek ziotsan: «Marixana,

                Ba dun amak bezain zabal!»

                Hark: «Hala ba da, Kristobal,

        sar iezôk pitoa aitak bezainbat barna...»

        Poematto hoik ene Urthe Berriko emaitza izan bekizkizu.

        Adiskide maite hori, uzten zaitut aldi hontako. Gu denen izenean, goraintzirik amultsuenak har itzazu.

        ' ' ' Jon Mirande.

        P.S. Zure eskutitza Peillentarrei helerazi nerauen. Hau da heien zuzenbidea: 15 bld Saint-Germain. Paris (V).