—164—

Etxaide'tar Jon'i

1961-I-21

Koldobika XVI gerren heriotzaren urtemugan (?)

        Adiskide maitea,

        Barkatu arren ez ba dizut lehen erantzun, bainan zuk jakin nai dituzun leku-izenen euskal-formak zirela eta, galdeera zenbait egin behar izan ditut Zuberoan, eta ihardespenen zai egon izan naiz. Ihardespenok oro ez ditut oraindik hartu; hartu bezain laster berriz idatziko dizut. Halaz ere ez dut nire erantzuna gehiegi luzatu nahi izan eta horrengatik hemen doazkizu ediren izan ditudan xehetasunak. Nere aitari, Peillenen aitari eta osaba bati eskatu dizkiet.

        GERONCE: eusk. Je(r)untze; j= frantses j guti gora-behera, ez lapurtarren j=        dd edo /d,/ edo euskera klasikoarena = /y/;

        MOUMOUR: Mumurr(r);

        SAINT GOIN: Sen Godentze;

        GEUS : Ustasü ( dio ene osabak; bitxi da -ü hori, nere ustez -e behar luke);

        GURS: Gürs;

        VIELLENAVE: Herriti;

        USQUAIN: Üzkañe;

        GESTAS: Jestase dio Peillendarrak; Jestasü, dio ene osabak; bigarren s =        euskera komunaren s soinuduna, hots, zuberotar j-aren egite ba du;

        BARRAUTE-CAMU: Berhueta;

        RIVEHAUTE: Arribahaute;

        TABAILLE: Taballa;

        ARRIVE: Arribe, dio Peillendarrak, Arriba, diote ene aitak eta osabak;

        CHARRE: Xarra;

        RIVAREYTE: Arribareita;

        OSSERAIN: Ozarañe, dio Peillenek; Ozagañe, dio ene osabak;

        ABITAIN: Abitañe; Peillenen aitak bigarren forma bat ba dela dio : Mithiñe        (?);

        ESCOS: Ezkoitze;

        PEYREHORADE: Peiorrada;

        ST GLADIE-PARENTIES: San-Gladi, dio Peillendarrak; Sen-Gladi, diote        Mirandetarrek eta Aiphasorhotarrek;

        ST-MARTIN: Donamartihi(r)i;

        ST PEE D'EN HAUT: Sempe (bigarren e-ak dakar akzenta);

        FEAS: Iñhazi;

        ANCE: Antso;

        ARAMITS: A(r)amitze, dio Peillenek; Aramitze, dio ene osabak.

        Agian xehetasun horiek lagunduko dizute egiten ari zeran mapa hortarako. Damu dut ez baitut gehiagorik billatu ahal izan; behar bada oraindik bat edo beste billatuko dut.

        Zorionak zuri Zuberotarren Herrenvolk edo jaunen arrazkoa zeralako, parte bederen, zure bigarren deiturak iduri erazten duen araura. Zure jenealogiaren axola baldin ba duzu, bearbada Xarre edo Xarrako auzapezari idatz ahal zenezaioke, argimendu billa, edo Basses-Pyrénées departamenduko Archiviste en chef delakoari; jatorri billaketako lanok ordaindu behar dira, tamalez, baina ez sobera.

        Zure eleberria aurrera al doa? Beste euskerazko idazkirik gertu al duzu? Nik artikulu zenbait egin ditut Egan-erako, bai eta frantsesezkoak ere hemengo aldizkari batzuetarako. Lan luzerik ez, ordea. Andimaren berririk ez dut aspaldi hontan jaso, eta ez dakit beraz ene Aur Besoetako gaixoak argia non ikusiko duen. Dena dela, euskerazko idazkiak argitaratzeko aurkitzen diren behaztopa eta eragozpenak (konformistak ez direnean) nazka ematen didate. Euskaldun ispiritu ertsiontzat gauza ez oituak eta berriak idaztea margaritas ad porcos botatzea da... (beharbada, ni naizela xerria esango du haatik...norbaitek...).

        Laster berriz idatziko ahal dizut. Anartean ene goraintzirik hoberenak zuri eta, Pilarri eta alabatxoei. Izan untsa!

        Jon Mirande eta Aiphassorho'ko.