—1860 Urruña—

Gizon sobrea eta edalea predikuan

Jean Baptiste Larralde

                      1

              Piarres sobrea

Mintzatzeko dohaina zein den prezagarri!

Egun, gure erretora zukan xoragarri;

Aspaldian ez diat nik eliza huntan

Predikurik aditu hoin hitz ederretan.

                      2

              Thomas edalea

Nahi bezen ederra, bainan luzegia,

Badik oren bat, hurran, nagoela egarria,

Eta nihon ez saltzen hemen edaririk

Ur benedikatua duk hortxe bakharrik.

                      3

              Piarres

Bainan, lau urhatsetan hor duk ithurria,

Ur bat zilharra bezen fresko eta garbia,

Bi saltoz eginen duk aise hire lana,

Hargatik thauna laster, meza ez duk emana.

                      4

              Thomas

Zer diok gizon xoro, guti funts, ergela,

Urez hor asetzeko, naski nauk igela?

Arno onez usatzen nuk egarria hausten,

Eta urik hoberenak aberentzat uzten.

                      5

              Piarres

Ez duk bada progotxu, hemen edaririk

Nekez duk khausituko galdetzen dukenik,

Behar bada erretorak ez nauk finkatuko,

Bazikek zenbeit xorta, bainan aldareko.

                      6

              Thomas

Hartako edo huntako, segur nuk ni ere

Ez dela zankhertia zenbeit flasku gabe,

Gehiago zioat, erran ez dukana,

Horko arnoa ez dela xuartxez egina.

                      7

              Piarres

Bah! izan edo ez izan, Thomas, hiretako,

Ene ustez igualtsu duk, ez hau hordituko;

Ilkhiko gaituk laster, erradautak, beraz,

Zer zaikan iduritu gure predikuaz.

                      8

              Thomas

Egiaz mintzatzeko, nik, gan den gabean,

Begia ez doiat hetsi, sukharra barnean,

Beraz, hemendik loa, handik egarria,

Ez nikan predikuan arras beharria.

                      9

              Piarres

Hanbat gaizto hiretzat, ez duk irabazi,

Atseginez ni, egun, ez nuk kasik bizi,

Zeruaz, hango gauzez luze duk hedatu,

Eta harat gateko, nahi nuk prestutu.

                      10

              Thomas

Luze! hoi bazakiat aspaldi nik ere,

Albiriste saririk hiri eman gabe,

Bainan, errak, zeruan baden mahastirik,

Eta, maiz aditzen den han irhintzinarik.

                      11

              Piarres

Edaria, sobraxe, duk Thomas, goguan,

Gose eta ez egarririk ez zukek zeruan,

Jaunaren laudatzeko kanta ez duk ixiltzen,

Bertzelako beharrik ez duk han frogatzen.

                      12

              Thomas

Hire ahotik, hi bethi, Piarres, haiz galtzen,

Zer! oren baten kantak gaitik egarritzen,

Nola, beraz, kantatu, bethi, bethi ere,

Zintzurra noiz edo noiz arnoz busti gabe?

                      13

              Piarres hasarratua

Jadanik eman daiat horren errepusta.

              Thomas

Bai, hala duk, Piarres, ez zimur kopeta,

Eta seguratzeko gaineko loria,

Egundik uzten diat arras edaria.