—1859 Urruña—
Urak eta gure arnuak
Joanes Etcheto
1
Urak eta gure arnuak
Hartu dukete disputa.
Urari dio gure arnoak:
Hakit hemendik aparta.
Refr.:
Zer da hire banitatea,
Neurekin konparatzeko?
Zer da hire pretenzionea!
Neurekin balsan jartzeko! (bis)
2
Urak dio gure arnoari:
Zoin fanfarrana haizen hi!
Hi haiz guzien erhogarri,
Orok gaitzesten haute hi.
Zer da...
3
Nik baditinat mahastiak,
Fruitu ederrez betheak,
Harat sartzen diren guziak
Atheratzen tun aseak.
Zer da...
4
Nik baditiat ithurriak
Kristaila bezen argiak,
Hik erhotu tukan guziak
Han dituzkek zuhurtuak.
Zer da...
5
Ni naun nekhatzale onetan
Indarraren emailea,
Bai eta hik flakatuetan
Ongi sustengatzailea.
Zer da...
6
Zer da etxeko zerbitzuan,
Ni gabe egiten denik?
Gauza guzien preparuan
Ni nauk hartua lehenik.
Zer da...
7
Ni naun oroz preferatua,
Errepas handienetan,
Segurki haiz mezprezatua,
Ni laudatzen nautenetan.
Zer da...
8
Hik dituk familak nahasten,
Hitan fida direnetan.
Bai-ta etxeak janarazten,
Hi Jainkotzat hautenetan.
Zer da...
9
Ni naun erien sokhorria,
Bai eta altxagarria.
Ez dun zeren kontra abia.
Ez dun hiretzat hauzia.
Zer da...
10
Ni nauk jende freskatzailea,
Hik berotu tukanetan,
Bai eta kontsolatzailea
Hik xahutu tukanetan.
Zer da...
11
Nik dinat ematen kuraia,
Hainitz gudu suertetan.
ez hadila beraz engaia,
Oi, neure kontra kantetan.
Zer da...
12
Ni naun phestetan enplegatzen,
Ponpa handitan ibiltzen.
Nik ditinat alegeratzen
Ni naiten ongi trinkatzen.
Zer da...
13
Neure kantak dituk prestuak,
Bai eta zuhurrarenak.
Hiriak dituk deboxkeriak
Bai etare nabarmenak.
Zer da...
14
Hik dituk dantzan harrarazten,
Buruan jo tukanetan,
Solas lizunak sorrarazten
Hik zoratu tukanetan.
Zer da...